༄༅། །ན་མོ་གུ་རུ་ཡེ། སྔོན་ཚེ་འཁོར་བ་འཇིག་དང་ཤཱཀྱའི་ཏོག །གངས་ལྗོངས་ཕག་གྲུར་བདེ་གཤེགས་རྡོར་རྒྱལ་ཞབས། །ཞིང་འདིར་རྒྱལ་བའི་བསྟན་ལ་རྒྱལ་བ་དངོས། །བསྟན་འཛིན་དོན་གྲུབ་ཞབས་ལ་གསོལ་བ་འདེབས། །གང་ཐུགས་གཞི་ཡི་འོད་གསལ་ཆེན་པོའི་ཀློང་། །མངོན་བྱང་ཆུབ་ཀྱང་སྐུ་གསུང་ཐུགས་ཀྱི་གསང་། །མི་ཟད་རྒྱན་གྱི་འཁོར་ལོར་ཤེས་པ་ཡི། །ཁྱབ་གདལ་མོས་གུས་ཆེན་པོས་གསོལ་བ་འདེབས། །མགོན་ཁྱོད་སྐྱབས་གནས་ཀུན་འདུས་ངོ་བོ་རུ། །སྙིང་ནས་ངེས་པ་རྙེད་པས་གསོལ་འདེབས་ན། །མི་ཤིགས་སྙིང་གི་ཐིག་ལེར་རྟག་བཞུགས་ནས། །དོན་བརྒྱུད་དགོངས་པའི་བྱིན་རླབས་འཕོ་བར་མཛོད། །སྔོན་བསགས་ལས་ཉོན་བག་ཆགས་མཐུ་བརྟས་པས། །ཚེ་འདིར་ཆོས་སྐུར་གྲོལ་བར་མ་ནུས་ནའང་། །ས་ལམ་མ་ལུས་རིམ་གྱིས་བགྲོད་གྱུར་ཏེ། །སྐུ་བཞིའི་རྒྱལ་ས་ཟིན་པར་བྱིན་གྱིས་རློབས། །ནམ་ཞིག་སྒྲུབ་བརྒྱུད་བསྟན་པ་རིན་པོ་ཆེ། །ཆེར་སྙིགས་དུས་ཀྱི་རྒུད་པས་སྒྲིབ་སྲིད་ན། །བརྩེ་ཆེན་ཐུགས་རྗེའི་རྟ་བདུན་གྱིས་དྲངས་ཏེ། །གཟུགས་སྐུའི་ཉིན་བྱེད་སླར་ཡང་འཆར་དུ་གསོལ། །རང་དོན་འགྱུར་མེད་ཆོས་སྐུའི་ཀློང་ཉིད་ལས། །གཞན་དོན་འགག་མེད་གཟུགས་སྐུའི་རྣམ་རོལ་གྱིས། །མཁའ་མཉམ་འགྲོ་བའི་དོན་ཆེན་སྒྲུབ་པ་ལ། །སྤྱན་རས་གཟིགས་དབང་ཅི་འདྲ་དེ་འདྲར་ཤོག །ཅེས་པའང་འཁོར་ལོའི་མགོན་པོ་གང་ལ་མི་ཕྱེད་དད་འཆང་སྐྱེ་བོ་ཡོངས་ཀྱི་གསོལ་བ་འདེབས་རྟེན་དུ་འཇིགས་གྲགས་མིང་པས་རང་བློ་མོས་པའི་རྗེས་སུ་འབྲངས་ཏེ་སྨོན་པ་དགེ་ལེགས་སུ་གྱུར་ཅིག། །།
0 Comments
ཐུགས་འཆར་བཀོད་གནང་།