༄༅། །ཐོག་མར་སྐྱབས་སེམས་ལན་གསུམ་སྔོན་དུ་བཏང་ནས་འདི་ལྟར། ཨཱཿ རང་མདུན་ནམ་མཁར་འཇའ་འོད་ཀློང་། །གྱད་དང་སེང་གེས་བཏེག་པའི་ཁྲིར། །པདྨ་ཉི་ཟླའི་གདན་གྱི་སྟེང༌། །སྐྱབས་ཡུལ་ཀུན་འདུས་རྡོ་རྗེ་འཆང་། །བཀའ་དྲིན་གསུམ་ལྡན་འཁོར་ལོའི་མགོན། །རྗེ་བཙུན་བསྟན་འཛིན་དོན་གྲུབ་མཆོག །དཀར་དམར་མཚན་དཔེའི་གཟི་མདངས་འབར། །ཞི་འཛུམ་ཉམས་ལྡན་མཁྱེན་བརྩེའི་སྤྱན། །ཆོས་ཉིད་ཀློང་ནས་བདག་ལ་གཟིགས། །ཕྱག་གཉིས་མཉམ་བཞག་ཚེ་བུམ་འཛིན། །རྣམ་གསུམ་ཆོས་གོས་སྐུ་ལ་མཛེས། །དབུ་ལ་རིགས་ཀྱི་ཅོད་པན་གསོལ། །ཞབས་གཉིས་རྡོ་རྗེའི་སྐྱིལ་ཀྲུང་བཅས། །དམ་ཡེ་གཉིས་མེད་ངོ་བོར་བཞུགས། །ཞབས་ཀྱི་པདྨོར་གུས་ཕྱག་འཚལ། །ཞེན་མེད་དག་པའི་མཆོད་པ་འབུལ། །ཉེས་ཚོགས་མ་ལུས་སྤྱན་སྔར་བཤགས། །བླ་མའི་མཛད་པར་རྗེས་ཡི་རང༌། །ལྷུན་གྲུབ་ཆོས་འཁོར་བསྐོར་བར་བསྐུལ། །གསང་གསུམ་མྱ་ངན་མི་འདར་གསོལ། །དགེ་ཚོགས་བྱང་ཆུབ་ཆེན་པོར་བསྔོ། །མཁྱེན་པའི་ཡེ་ཤེས་ཉི་མ་ཡིས། །སྙིང་གི་མུན་པ་སེལ་དུ་གསོལ། །བྱིན་རླབས་བདུད་རྩིའི་ཆར་རྒྱུན་གྱིས། །ཉམས་རྟོགས་མྱུ་གུ་བསྐྱེད་དུ་གསོལ། །ཚད་མེད་ཐུགས་རྗེའི་ལྕགས་ཀྱུ་ཡིས། །བདེ་ཆེན་ས་ལ་དྲང་དུ་གསོལ། །མཐུ་སྟོབས་ནུས་པའི་དྲག་སྔགས་ཀྱིས། །ལོག་འདྲེན་བར་ཆད་བསལ་དུ་གསོལ། །མདོར་ན་འདི་ཕྱི་བར་གསུམ་དུ། །བདག་ལ་སྐྱབས་གནས་རེ་ས་གཞན། །མེད་དོ་དྲིན་ཅན་བླ་མ་མཁྱེན། །ཞེས་གསལ་བཏབ་ནས་ཡན་ལག་བདུན་པ་བཅས་ཕུལ་གྲུབ་པ་དང༌། སངས་རྒྱས་ཀུན་འདུས་སོགས་གསོལ་འདེབས་ཅི་ནུས་བཟླས་མཐར། སྐུ་ཡི་བྱིན་རླབས་སོགས་ཀྱིས་དབང་བཞི་བླང་ནས་ཐུགས་ཡིད་བསྲེས་ལ་མཉམ་པར་བཞག། དེ་ལས་ལངས་ཏེ་དགེ་བསྔོ་ཤིས་བརྗོད་སྤྱི་ལྟར་བྱའོ། །ཞེས་པའང་ནང་མཆེད་གཞོན་པ་མཁན་ལུང་རིགས་མཚན་ཅན་ནས་ལྷ་རེག་རྟེན་བཅས་བསྐུལ་ངོར་གང་གི་སློབ་འབངས་འཇིགས་གྲགས་པས་མི་ཤེས་ན་ཡང་གསོལ་བ་འདེབས་བཞིན་བྲིས་པ་དོན་ལྡན་དུ་གྱུར་ཅིག། །།
0 Comments
ཐུགས་འཆར་བཀོད་གནང་།