ཟ་ཧོར་གྱི་རྒྱལ་བརྒྱུད་རྣམ་དཔྱོད་མཚུངས་པ་མེད་པ་བསོད་ནམས་དར་ཞིང་རྒྱས་པའི་ལྷ་ལ་གདམས་པའི་ཚིགས་སུ་བཅད་པ།

ཟ་ཧོར་གྱི་རྒྱལ་བརྒྱུད་རྣམ་དཔྱོད་མཚུངས་པ་མེད་པ་བསོད་ནམས་དར་ཞིང་རྒྱས་པའི་ལྷ་ལ་གདམས་པའི་ཚིགས་སུ་བཅད་པ།

དཔལ་འབྲུག་པ་ཡབ་སྲས་ལ་ཕྱག་འཚལ་ལོ། །དྲན་པའི་ཐིགས་པ་ཡིད་ལ་ལྷུང་བས་ཀྱང་། །སྲིད་པའི་གདུང་བས་གླགས་རྙེད་མི་འགྱུར་བའི། །དམ་ཆོས་བདུད་རྩིའི་ཆར་པ་སྤྲོ་མཛད་པ། །བཀའ་རྒྱུད་སྤྲིན་གྱི་ཕྲེང་བ་དེ་དག་རྒྱལ། །ཉམ་ང་འཁོར་བའི་བཙོན་ར་འཇིགས་རུང་འདིར། །སྐྱིད་དུ་རེས་ཀྱང་མི་བཟད་སྡུག་བསྔལ་གྱིས། །ཁོར་མོ་གཙེས་པའི་ཟུག་རྔུ་འཚལ་བའི་ཡིད། །དམ་པའི་ཆོས་ལ་གདུང་བ་སུ་ཡིས་ལྷོགས། །འཇིག་རྟེན་མི་རྟག་གཡོ་བ་སྤྲིན་བཞིན་དང་། །ཚེ་སྲོག་མི་བརྟན་རྩྭ་ཁའི་ཟིལ་འདྲ་དང་། །དབུགས་ནི་ཡལ་སྐྱེན་ན་བུན་ལྟར་ཤེས་ལ། །སྙོམ་སེམས་ལེ་ལོ་སྐྱེ་བའི་གོ་སྐབས་ཅི། །རྒྱལ་བ་རྣམས་དང་ནམ་ཡང་མི་ཕྱེད་པའི། །རྡོ་རྗེ་སློབ་དཔོན་ཞབས་ཀྱི་པདྨོ་ལ། །འདི་ཕྱི་ཀུན་གྱི་རེ་བལྟོས་བྱས་གྱུར་ན། །ཚེ་གཅིག་སངས་རྒྱས་འགྲུབ་ལ་དཀའ་རྒྱུ་ཅི། །ནམ་མཁའི་ཁམས་ཀྱི་རྗེས་སོང་ཆོས་ཕུང་གིས། །ཕ་མཐའ་བསླབས་ཤེས་ཙམ་གྱིས་ག་ནས་རྙེད། །བླ་མའི་མན་ངག་སྙིང་ལ་ཞེན་གྱུར་ན། །ཆོས་རྣམས་ཀུན་གྱི་རང་མཚང་ཁྱོད་ལ་སྟོན། །སྲིད་འདིར་ཐེག་པའི་རྣམ་གྲངས་མང་ཡོད་ཀྱང་། །བདེ་བར་གཤེགས་རྣམས་བགྲོད་པ་གཅིག་པའི་ལམ། །མ་བཅོས་ལྷུག་པའི་ངང་དུ་འཇོག་ནུས་ན། །རྒྱལ་བའི་ཡོན་ཏན་མ་ལུས་ཞར་ལ་འབྱུང་། །མི་བསྲུན་འཁོར་བའི་གནོད་པ་རྣམས་སྦྱོར་བའི། །ཉོན་མོངས་དུག་ལྔའི་དགྲ་ཐབས་ཇི་སྙེད་པ། །རང་སེམས་དྲན་པའི་གཡུལ་དུ་འདུལ་བ་ལས། །སྒྲིབ་གཉིས་སྦྱང་བའི་མཆོག་གཞན་ག་ནས་རྙེད། །འགྲོ་དྲུག་ཕ་མར་ཤེས་ནས་དྲིན་ལན་དུ། །རང་དོན་ཡལ་བར་བོར་བའི་སྙིང་རྗེ་ཡིས། །རྟག་ཏུ་གཞན་དོན་འབའ་ཞིག་ལྷུར་ལེན་ལས། །ཚོགས་གཉིས་གསོག་པའི་ཐབས་མཁས་སུ་ལ་ཡོད། །ཁམས་དྲུག་ལྡན་པའི་རྡོ་ཇེའི་ལུས་གཅུན་ནས། །གཡས་གཡོན་འཕོ་བ་ཉི་ཟླའི་རླུང་བཀག་སྟེ། །འཛག་མེད་བདེ་བའི་འགྲོས་བཞིར་སློབ་རྣམས་ལ། །དྲོད་རྟགས་ཡོན་ཏན་ཐོབ་ལ་འགྱངས་ཆ་ཅི། །དངོས་འཛིན་གདོན་གྱིས་སྦྱར་བའི་སྒྱུ་མ་རྣམས། །རང་རིག་ཡེ་ཤེས་ངང་དུ་རོ་སྙོམ་པའི། །བརྟུལ་ཞུགས་སྤྱོད་པའི་ཡ་ལད་སུས་གྱོན་པར། །བདུད་བཞི་དགྲ་བོས་བར་གཅོད་ཅི་ལ་ཚུགས། །སྲིད་གསུམ་སྦྱོར་བ་སྨྱོན་པའི་གར་བཞིན་དང་། །ཚེ་འདིའི་སྣང་བ་རྨི་ལམ་ཇི་ལྟ་བར། །ཁ་ཙམ་མིན་པ་སྙིང་ནས་མཐོང་བ་ལས། །གཞན་པའི་ཆོས་ཀྱི་དགོས་པ་བཙལ་ནས་ཅི། །རྨོངས་རྣམས་གོ་ཕྱིར་མང་པོའི་ཚིག་སྤྲོས་མོད། །དེ་དག་དུས་ཀྱི་དེ་ལ་བལྟ་མི་ཁོམ། །ཤེས་ལྡན་ཁྱོད་ཉིད་དྲན་གསོར་ཉུང་ངུའི་གཏམ། །མེ་ཏོག་ཕྲེང་བ་ཆབ་ཀྱིས་དྲན་པ་བཞིན། །མི་དབང་ཐུགས་ཀྱི་པདྨ་ཅན་དགའ་བའི། །ལེགས་བཤད་ཀུ་མུ་ཏ་རྣམས་འབྱེད་ནུས་པ། །རྣམ་དཔྱོད་འོད་དཀར་ཅི་ཡང་འཛིན་པ་ནི། །སྨྲ་བའི་ཟླ་བ་པུཎྜ་རཱི་ཀ་ཡིན། །ཞེས་ཟ་ཧོར་གྱི་རྒྱལ་བརྒྱུད་རྣམ་དཔྱོད་མཚུངས་པ་མེད་པ་བསོད་ནམས་དར་ཞིང་རྒྱས་པའི་ལྷ་ལ། པདྨ་དཀར་པོས་ལྷོ་བྲག་མཁར་ཆུ་ནས་གདམས་པའོ།།