གསོལ་འདེབས་བུའི་གདུངས་དབྱངས་བཞུགས་སོ།།

༄༅། །དུས་གསུམ་སངས་རྒྱས་སྤྱི་འདུས་མི་ཡི་གཟུགས། །འདི་ཕྱི་ཀུན་གྱི་སྐྱབས་གནས་རིན་པོ་ཆེ། །དྲན་པས་གདུངས་སེལ་རྩ་བའི་བླ་མ་ལ། །གསོལ་བ་འདེབས་སོ་དབྱིངས་ནས་དགོངས་པར་མཛོད། །གཞི་དབྱིངས་སྟོང་གསལ་དྲྭ་བའི་སྒྱུ་མའི་སྐུ། །ལམ་གྱི་ཡེ་ཤེས་སྣང་བ་བཞི་ཡི་མཐུས། །འབྲས་བུ་ཆོས་ཟད་ཁྱད་ཆོས་དྲུག་ལྡན་ཀློང་། །རྣམ་པར་གྲོལ་ལ་བདག་ཅག་དགའ་རིགས་མོད། །འོན་ཀྱང་དེང་འདིར་བསྟན་པ་རྒུད་པའི་སྐབས། །ཆོས་ཀྱི་སྣང་བ་མུན་པའི་གླིང་ལ་འགྲན། །གསལ་བྱེད་མེ་ཁྱེར་ཙམ་ཡང་དཀོན་པའི་ཁྲོད། །ཁྲི་གདུགས་དགུང་ལ་ཡལ་བ་ཅི་མི་ཕངས། །དཔྱད་ན་དེང་དུས་འཇིག་རྟེན་ཁམས་ཀུན་ཏུ། །དུས་འཚུབ་ནད་ཀྱིས་འགྲོ་བ་ཕལ་ཆེར་གུམ། །བར་དོར་སེམས་ཅན་གང་བར་མ་བཟོད་ནས། །ལམ་རྣ་འདྲེན་དུ་བྱོན་ལ་ཐེ་ཚོམ་བྲལ། །གསོན་པ་རྣམས་ཀྱང་རང་གི་ལས་དབང་གིས། །ལན་ཆགས་ནད་དུ་ལྡང་བར་ཐུགས་བརྩེ་བས། །འཆི་བ་འོད་གསལ་རྫོགས་སངས་རྒྱས་པའི་མཐུས། །ནད་ཡམས་བཟློག་པར་དགོངས་ལ་ངེས་པ་རྙེད། །བདག་ཅག་སྐྱེ་བའི་ཕྲེང་བ་ཐམས་ཅད་དུ། །ཉིད་བྱོན་སྐུ་གསུམ་ཞིང་ཁམས་ག་ལ་བར། །ཚེ་འདིའི་སྣང་བ་ནུབ་པའི་སྐད་ཅིག་ལ། །འདྲེན་པའི་ཕྱག་རིང་རྐྱོངས་ཤིག་རྗེ་བླ་མ། །མི་རྟག་སྒྱུ་མའི་སྣང་བ་ཚེ་འདིར་ཡང་། །དཔལ་ལྡན་བླ་མའི་གདམས་པའི་གཅུད་ལེན་གྱིས། །ཉིན་མཚན་ཆོས་ཀྱི་འདའ་བའི་རི་ཁྲོད་དུ། །ཉམས་རྟོགས་ལུས་ཟུང་རྒྱས་པར་བྱིན་གྱིས་རློབས། །འོན་ཀྱང་སྡིག་སྒྲིབ་ཆེ་བའི་རྐྱེན་དབང་གིས། །ལམ་ལ་གོལ་ས་ནོར་ས་འབྱུང་ཉེན་ན། །དངོས་སམ་མཚན་མོའི་རྨི་ལམ་ཟོལ་གྱིས་ནི། །ལུང་བསྟན་གོལ་ས་གཅོད་དེ་བྱིན་གྱིས་རློབས། །ཀུན་རྫོབ་སྒྱུ་མའི་སྐུ་ལུས་མི་མངོན་ཀྱང་། །དོན་དམ་ཆོས་སྐུ་རིག་པའི་བླ་མ་ཉིད། །སེམས་ལ་འདུ་འབྲལ་མེད་པའི་རྣལ་འབྱོར་གྱིས། །ཐུགས་ཡིད་གཅིག་ཏུ་འདྲེས་པར་བྱིན་གྱིས་རློབས། །ཞེས་པ་འདིའང་རང་ཉིད་མཚམས་ཁུལ་དུ་ཡོད་བཞིན་པར་སྲིད་པ་གསུམ་དུ་འགྲན་པའི་ཟླ་དང་བྲལ་བ་དཔལ་ལྡན་རྩ་བའི་བླ་མ་རིན་པོ་ཆེ་རྒྱལ་བ་བསྟན་འཛིན་དོན་ཀུན་གྲུབ་པའི་སྡེ་དགོངས་པ་ཆོས་ཀྱི་དབྱིངས་སུ་གཤེགས་པ་ལ་ཡིད་གདུངས་བའི་ངང་ནས་གང་གི་ཐུགས་རྗེའི་སྐྱབས་འོག་ཏུ་འཚོ་བ་ཕུན་སུམ་ཚོགས་པའི་མིང་ཅན་གྱིས་ཨྱོན་དཔལ་རིའི་སྤོང་ཁང་དུ་བྲིས་པའོ། །           ། །