དཔལ་ལྡན་བླ་མ་དྲན་པའི་གདུངས་དབྱངས།

བླ་མ་ངག་དབང་རྣམ་རྒྱལ་ལ་ཕྱག་འཚལ་ལོ།།

༄༅། །ཕ་མཁྱེན་ནོ་མཁྱེན་ནོ་བླ་མ་མཁྱེན། །བུ་སྙིང་ནས་དད་པས་གསོལ་བ་འདེབས། །དུས་ངན་གྱི་བསམ་སྦྱོར་ལ་དགོངས་ནས། །ཐུགས་ཡལ་ཡོལ་བཏང་སྙོམས་མི་མངའ་བར། །ངེད་བུ་སློབ་རྣམས་ལ་བརྩེར་དགོངས་ནས། །ཐུགས་ཆོས་ཉིད་ཟབ་མོའི་དབྱིངས་ནས་བཞེངས། །འདིར་བདག་ཅག་རྗེས་འཇུག་བུ་སློབ་རྣམས། །ཁྱོད་མིན་པའི་སྐྱབས་གཞན་སུ་ལ་རེ། །ད་ཐུགས་རྗེ་ཀློང་ནས་གཟིགས་རེ་རན། །རྗེ་བླ་མའི་ཐུགས་རྗེ་བྱིན་རླབས་ཀྱིས། །བདག་སྡིག་ཅན་སྒྲིབ་པ་སྦྱང་དུ་གསོལ། །ཚེ་འདི་ལ་ཞེན་པ་བཟློག་ཏུ་གསོལ། །གཉིས་འཛིན་གྱི་འཁྲུལ་པ་ཞིག་ཏུ་གསོལ། །ཕ་བླ་མ་སྒྲུབ་པའི་སྤྱན་སྔ་ན། །བུ་དད་པའི་མིག་ལས་མཆི་མ་འཁྲུགས། །དེ་ཕ་ཡི་སྤྱན་གྱིས་གཟིགས་སམ་ཅི། །བུ་དགྱེས་པའི་འཛུམ་ཞལ་མཇལ་སྙིང་འདོད། །སྐུ་མངོན་སུམ་བདག་ལ་སྟོན་མཛད་ནས། །ལུས་སྐུ་ཡི་བྱིན་གྱིས་བརླབ་ཏུ་གསོལ། །ངག་གདུངས་དབྱངས་ང་རོའི་འོ་དོད་འབོད། །དེ་ཕ་ཡི་སྙན་ལ་ཅང་གསན་ནམ། །བུ་གསུང་གི་བདུད་རྩི་འཐུང་སྙིང་འདོད། །གསུང་མངོན་སུམ་བདག་ལ་དབུགས་དབྱུང་ནས། །ངག་གསུང་གི་བྱིན་གྱིས་བརླབ་ཏུ་གསོལ། །ཡིད་རྩེ་གཅིག་ཁྱོད་ཀྱི་ཡོན་ཏན་དྲན། །དེ་ཕ་ཡི་ཐུགས་ཀྱི་དགོངས་ལགས་སམ། །བུ་རྟོགས་པའི་ཡེ་ཤེས་ཞུ་སྙིང་འདོད། །ཐུགས་རྟོགས་པ་མངོན་སུམ་བདག་ལ་འཕོ། །ཡིད་ཐུགས་ཀྱི་བྱིན་གྱིས་བརླབ་ཏུ་གསོལ། །ཕ་བླ་མའི་རྟོགས་པའི་ཡེ་ཤེས་ཀྱིས། །བུ་བདག་རྒྱུད་གྲོལ་བར་བྱིན་གྱིས་རློབས། །དུས་ད་ལྟར་གྲོལ་བར་བྱིན་གྱིས་རློབས། །སྟན་འདི་རུ་གྲོལ་བར་བྱིན་གྱིས་རློབས། །དགེའོ།།