རྩ་བའི་བླ་མར་གསོལ་བ་འདེབས་པ།

༄༅། །རྗེ་རང་རིག་རྟོགས་པའི་རྣལ་འབྱོར་པ། །ལམ་གང་ཤར་དགག་སྒྲུབ་སྤང་བླང་བྲལ། །བདག་རང་ངོ་ཤེས་པར་གསོལ་བ་འདེབས། །ཕ་ཁྱེད་རང་ལྟ་བུར་བྱིན་གྱིས་རློབས། །རྗེ་མོས་གུས་མཐར་ཕྱིན་རྣལ་འབྱོར་པ། །སྣང་གྲགས་ཀུན་བླ་མ་དམ་པ་ཤར། །བདག་རང་སྣང་དག་པར་གསོལ་བ་འདེབས། །ཕ་ཁྱེད་རང་ལྟ་བུར་བྱིན་གྱིས་རློབས། །རྗེ་རོ་སྙོམས་རྟོགས་པའི་རྣལ་འབྱོར་པ། །རྐྱེན་བདུད་བཞི་འཇོམས་པའི་དཔའ་བོ་ཆེ། །བདག་རེ་དོགས་བྲལ་བར་གསོལ་བ་འདེབས། །ཕ་ཁྱེད་རང་ལྟ་བུར་བྱིན་གྱིས་རློབས། །རྗེ་ཐོག་མཐའ་མེད་པའི་རྣལ་འབྱོར་པ། །དཔལ་དང་པོའི་སངས་རྒྱས་གདོད་མའི་མགོན། །བདག་ལྷུན་གྲུབ་ཆེན་པོར་གསོལ་བ་འདེབས། །ཕ་ཁྱེད་རང་ལྟ་བུར་བྱིན་གྱིས་རློབས། །རྗེ་གཞན་ཕན་མཛད་པའི་རྣལ་འབྱོར་པ། །ཁམས་གསུམ་གྱི་འཁོར་བ་དོང་ནས་སྤྲུགས། །བདག་འགྲོ་དོན་འགྲུབ་པར་གསོལ་བ་འདེབས། །ཕ་ཁྱེད་རང་ལྟ་བུར་བྱིན་གྱིས་རློབས། །རྗེ་རྒྱལ་བ་ཀུན་གྱི་ཕྲིན་ལས་པ། །སྐྱབས་འགྲན་ཟླ་བྲལ་བའི་རིན་པོ་ཆེ། །ཕ་འདྲེན་མཆོག་བླ་མ་འགྲོ་བའི་མགོན། །བདག་མོས་པའི་བུ་ལ་ཐུགས་རྗེས་གཟིགས། །གཞི་མ་བཅོས་གཉུག་མ་ཆོས་ཀྱི་སྐུ། །དོན་གཉིས་མེད་ཟུང་འཇུག་ལོངས་སྤྱོད་རྫོགས། །ལམ་འགག་མེད་གང་ཤར་སྤྲུལ་པའི་སྐུ། །བདག་སེམས་ཉིད་ངང་དུ་དབྱེར་མེད་ཀྱང་། །འཁོར་མ་དག་གདུལ་བྱའི་སྣང་ངོ་ལྟར། །སྐུ་གདུལ་བྱ་གདུལ་བྱེད་དེ་ཁོ་ན། །ཞིང་འདིར་ཡང་བསྐལ་བརྒྱར་ཞབས་བརྟན་ཅིང་། །མིག་ངོམས་མེད་ཀྱི་བདུད་རྩི་བརྟན་པར་ཤོག །ལྷ་བརྩེ་བས་མཛད་པའོ།།                      །།