 |
| Add caption |
༄༅། །རྒྱལ་བའི་སྐུ་གསུང་ཐུགས་ཀྱི་ངོ་བོ་ཉིད། །ཡོན་ཏན་རིན་ཆེན་དཔག་ཏུ་མེད་པའི་གཏེར། །རྒྱ་ཆེ་རྒྱུན་མི་ཆད་པའི་འཕྲིན་ལས་ཅན། །ཆོས་རྗེ་རིན་པོ་ཆེ་ལ་གསོལ་བ་འདེབས། །འགྲོ་ཀུན་སྲིད་པའི་རྒྱ་མཚོ་ལས་སྒྲོལ་ཞིང་། །མྱང་འདས་དམན་པའི་གཡང་ས་རབ་སྤངས་ཏེ། །བླ་མེད་བྱང་ཆུབ་མཆོག་ལ་སྦྱོར་མཛད་པའི། །ཆོས་རྗེ་རིན་པོ་ཆེ་ལ་གསོལ་བ་འདེབས། །སྐལ་དམན་སེམས་ཅན་འདུལ་བའི་དོན་གྱི་ཕྱིར། །དུས་གསུམ་རྒྱལ་བའི་འཕྲིན་ལས་གཅིག་བསྡུས་ནས། །ཐ་མལ་ཚུལ་གྱིས་འགྲོ་བ་འདྲེན་མཛད་པའི། །ཆོས་རྗེ་རིན་པོ་ཆེ་ལ་གསོལ་བ་འདེབས། །བདེ་གཤེགས་མང་པོས་བསྒྲལ་བར་མ་ནུས་པའི། །དམུ་རྒོད་གདུལ་དཀའི་སེམས་ཅན་མང་པོ་རྣམས། །རྒལ་དཀའ་འཁོར་བའི་མཚོ་ལས་སྒྲོལ་མཛད་པའི། །ཆོས་རྗེ་རིན་པོ་ཆེ་ལ་གསོལ་བ་འདེབས། །གང་ཞིག་གུས་པ་ཆེན་པོས་ཉེར་བསྟེན་ནས། །གནས་སྐབས་མཐར་ཐུག་དགོས་འདོད་མ་ལུས་པ། །འབད་རྩོལ་མེད་པ་མྱུར་དུ་སྩོལ་མཛད་པའི། །ཆོས་རྗེ་རིན་པོ་ཆེ་ལ་གསོལ་བ་འདེབས། །དོན་མེད་ཚེ་འདིའི་བྱ་བ་སྒྲུབ་སྒྲུབ་ནས། །དོན་ཆེན་ཡལ་བར་ཤོར་བའི་སྙིང་མེད་པོ། །དལ་འབྱོར་མི་ལུས་སྟོང་ལོག་བྱེད་ཉེན་གདའོ། །ཚེ་འདི་བློ་ཡིས་ཐོངས་པར་བྱིན་གྱིས་རློབས། །དེ་རིང་ཙམ་ཡང་མི་འཆིའི་གདེངས་མེད་ཀྱང་། །གཏན་དུ་སྡོད་གྲབ་བྱེད་པའི་ངང་རིང་པོ། །འཆི་ཁར་བྲག་ལག་འཐབ་མོ་འཆོར་ཉེན་གདའོ། །འཆི་བ་རྗེས་སུ་དྲན་པར་བྱིན་གྱིས་རློབས། །ད་ལྟའི་སྡུག་བསྔལ་ཕྲ་མོ་མི་བཟོད་ཀྱང་། །ལས་འབྲས་ཁྱད་དུ་གསོད་པའི་སྙིང་ཁམས་ཅན། །འཇིགས་རུང་ངན་འགྲོའི་གཡང་སར་འཆོར་ཉེན་གདའོ། །ཉིན་མཚན་ཆོས་ཀྱིས་འདའ་བར་བྱིན་གྱིས་རློབས། །འགྲོ་བའི་སྡུག་བསྔལ་མཐོང་ཐོས་དྲན་གྱུར་ཀྱང་། །བ་སྤུ་གཡོ་འགུལ་མེད་པའི་སྙིང་རིང་པོ། །རང་གཞན་དོན་གཉིས་རེ་ཐག་ཆད་ཉེན་གདའོ། །བྱམས་དང་སྙིང་རྗེ་འབྱོངས་པར་བྱིན་གྱིས་རློབས། །གཞན་གནོད་གཞི་བཅས་སྤོང་བར་ཁས་བླངས་ནས། །དགྲ་ལ་སྡུག་ལས་ཐོང་བའི་ཕོ་རྒོད་པོ། །རང་གི་སྡོམ་གསུམ་ཡུལ་ནས་འདོན་ཉེན་གདའོ། །གནོད་སེམས་རྩད་ནས་ཐོན་པར་བྱིན་གྱིས་རློབས། །དགེ་སྦྱོར་ཆོས་བཞིན་སྒྲུབ་པར་དམ་བཅས་ནས། །ཁ་དྲག་དབང་ཆེན་འདོད་པའི་ང་རྒྱལ་ཅན། །ཁས་བླངས་ཐོག་ཏུ་འཁེལ་བར་མི་གདའོ། །རྟག་ཏུ་དམན་ཆ་འཛིན་པར་བྱིན་གྱིས་རློབས། །འགྲོ་ཀུན་ཕན་བདེ་སྒྲུབ་པར་ཁས་བླངས་ནས། །གཞན་གྱི་འབྱོར་ལ་ཁྲོ་བའི་ཕྲག་དོག་ཅན། །ཁས་ལེན་ཆེ་ལ་ཉམས་ལེན་ཆུང་བར་གདའོ། །གཞན་བདེ་དགའ་བ་སྐྱེ་བར་བྱིན་གྱིས་རློབས། །བདག་བས་གཞན་གཅེས་སྒོམ་པར་ཁས་བླངས་ནས། །གནོད་ལེན་གནོད་པས་འཇལ་བའི་ཞེ་བཞག་ཅན། །རང་གཞན་གཉིས་ཕུང་ལས་ལ་འཇུག་ཉེན་གདའོ། །གནོད་ལེན་ཕན་པ་སྒྲུབ་པར་བྱིན་གྱིས་རློབས། །ཅིར་སྣང་བདེན་པ་མེད་ཅེས་ཚིག་སྨྲ་ཡང་། །བསྟོད་སྨད་ཙམ་ལ་དགའ་དང་མི་དགའ་སྐྱེ། །ཉམས་ལེན་ཕྱོགས་ཙམ་འགྲུབ་པར་མི་གདའོ། །བདག་འཛིན་རྩད་ནས་ཐོན་པར་བྱིན་གྱིས་རློབས། །ཐོག་མེད་དུས་ཀྱི་དྲིན་ཅན་ཕ་མ་རྣམས། །བཟོད་དཀའི་སྡུག་བསྔལ་དྲག་པོས་གདུངས་གྱུར་ཀྱང་། །བདག་ལ་སྐྱོབ་པའི་ནུས་པ་མི་གདའོ། །མཁྱེན་བརྩེ་ནུས་ལྡན་ཁྱེད་ཀྱིས་ཐུགས་རྗེས་ཟུངས། །ཚ་བས་གདུངས་ཚེ་བསིལ་བྱེད་དྲིན་ཅན་རྣམས། །དམྱལ་མེ་བཟོད་དཀས་ཡུན་རིང་བསྲེགས་གྱུར་ཀྱང་། །བླུན་པོ་བདག་གིས་ཅུང་ཟད་སྐྱོབ་མ་ནུས། །དེ་དག་མྱུར་དུ་སྐྱོབས་ཤིག་ཐུགས་རྗེ་ཅན། །ལུས་ཀྱི་དྲོད་ཀྱིས་བདག་ལུས་བསྐྱངས་པའི་མ། །གྲང་བས་ཉེན་ནས་ཤ་རུས་གས་གྱུར་ཀྱང་། །བདག་གིས་ཅུང་ཟད་སྐྱབས་པར་མ་ནུས་པས། །དེ་དག་མྱུར་དུ་སྐྱོབས་ཤིག་ཐུགས་རྗེ་ཅན། །ཡང་ཡང་ནུ་ཞོས་སྐྱོང་བྱེད་མ་རྣམས་ཀྱིས། །ལོ་བརྒྱར་ཟས་སྐོམ་རྙེད་པར་མ་གྱུར་ཀྱང་། །ཆུ་ཐིགས་ཙམ་ཡང་སྦྱིན་པར་མ་ནུས་སོ། །དེ་དག་མྱུར་དུ་སྐྱོབས་ཤིག་ཐུགས་རྗེ་ཅན། །གཅིག་ལ་གཅིག་ཟ་མི་སྡུག་ཕྲད་པ་དང་། །སྡུག་དང་བྲལ་དང་སྐྱེ་རྒ་ན་འཆི་སོགས། །སྡུག་བསྔལ་མང་པོས་ཉམ་ཐག་འགྲོ་བ་རྣམས། །མྱུར་དུ་སྐྱོབས་ཤིག་ཚད་མེད་ཐུགས་རྗེ་ཅན། །སྲིད་པའི་བཙོན་རར་སྡུག་བསྔལ་མང་པོས་གཟིར། །ལས་དང་ཉོན་མོངས་འཆི་བ་དམ་པོས་བཅིངས། །མགོན་སྐྱབས་མེད་པའི་འགྲོ་བ་འདི་རྣམས་ཀྱི། །མགོན་སྐྱབས་མཛོད་ཅིག་ཚད་མེད་ཐུགས་རྗེ་ཅན། །རྒྱལ་སྲས་དངུལ་ཆུ་ཐོགས་མེད་ཀྱིས་མཛད་པའོ།། །།
0 Comments
ཐུགས་འཆར་བཀོད་གནང་།