སྨོན་ལམ་རྡོ་རྗེའི་རྒྱ་མདུད།
༄༅། །དུས་གསུམ་སངས་རྒྱས་ཐམས་ཅད་ཀྱི་ངོ་བོ་དཔལ་མགོན་བླ་མ་དམ་པའི་ཞབས་ལ་ཕྱག་འཚལ་ཞིང་གསོལ་བ་འདེབས་སོ་བྱིན་གྱིས་བརླབ་ཏུ་གསོལ། མི་ངའི་སྐྱེ་བ་ནས་སྐྱེ་བ་ཚེ་རབས་ནས་ཚེ་རབས་ཐམས་ཅད་དུ་དལ་འབྱོར་གྱི་ཆོས་བཅོ་བརྒྱད་ཚང་བའི་མི་ལུས་རིན་པོ་ཆེ་ཐོབ་ཅིང་ཤེས་བྱའི་གནས་མཐའ་དག་བདེ་བླག་ཏུ་རྟོགས་ནུས་པའི་བློ་གྲོས་དང་ལྡན་པར་གྱུར་ཅིག །སྐྱེས་མ་ཐག་ཏུ་དད་པས་ཀུན་ནས་བསླངས་ཏེ་དཀོན་མཆོག་གསུམ་གྱི་སྐྱབས་འོག་ཏུ་འཇུག་ཅིང་བློ་ཆོས་སུ་འགྲོ་བ་སྐྱེས་བུ་ཆུང་ངུའི་ལམ་ལ་འཇུག་པར་བྱེད་དེ་ཐར་པའི་སྣོད་རུང་དུ་འགྱུར་བར་ཤོག་ཅིག །གཞོན་ནུའི་དུས་ནས་ལྔ་ཕྲུགས་ཉེར་གཅིག་གི་ཡོན་ཏན་དང་ལྡན་པའི་མཁན་སློབ་དགེ་འདུན་གྱི་སྤྱན་སྔར་ངེས་པར་འབྱུང་བས་ཀུན་ནས་བསླངས་ཏེ་ཚིགས་གསུམ་རིམ་པར་ནོད་ཅིང་ལྟུང་བ་འབྱུང་བའི་སྒོ་བཞི་བསྡམས་ནས་བསླབ་པ་གསུམ་ཡོངས་སུ་སྦྱོང་བའི་ཆོ་གས་སྐྱེས་བུ་འབྲིང་གི་ལམ་ལ་འགྲུས་པར་བྱེད་དེ་ཐར་པའི་རྒྱལ་མཚན་བརྟན་པར་གྱུར་ཅིག །མི་རིང་བར་བྱམས་སྙིང་རྗེ་བྱང་ཆུབ་སེམས་ཀྱིས་ཐུགས་རྒྱུད་འབྱོངས་པའི་དགེ་བའི་བཤེས་དང་མཇལ་ཏེ་ཐོས་བསམ་གྱི་སྒྲོ་འདོགས་ཆོད་ནས་བསམ་པ་བྱང་ཆུབ་མཆོག་ཏུ་སེམས་བསྐྱེད་དེ་བདག་གཞན་མཉམ་བརྗེ་བསྒོམས་ནས། སྦྱོར་བ་ཕྱིན་དྲུག་བསྡུ་བཞི་དང་ཞི་ལྷག་ཟུང་འབྲེལ་གྱི་སྒོ་ནས་སྐྱེས་བུ་ཆེན་པོའི་ལམ་ལ་སློབ་པར་བྱས་ཏེ་རྣམ་པ་ཐམས་ཅད་མཁྱེན་པའི་གོ་འཕང་ཐོབ་པར་གྱུར་ཅིག །རྡོ་རྗེ་སློབ་དཔོན་མཚན་ལྡན་གྱི་གདུལ་བྱར་གྱུར་ནས་དབང་གིས་སྨིན་ཅིང་དམ་ཚིག་ལས་མི་འདའ་བར་བསྐྱེད་རྫོགས་ཟུང་འཇུག་གི་སྒོ་ནས་སྐྱེས་བུ་ཆེན་པོའི་མཆོག་གི་ལམ་ཟབ་ཉམས་འོག་ཏུ་ཆུད་པར་བྱས་ཏེ་གྲུབ་གཉིས་ལ་ཅི་དགར་སྤྱོད་པའི་སྐལ་བ་དང་ལྡན་པར་གྱུར་ཅིག །ཁྱད་པར་དུ་ཡང་བླ་མ་ལ་སངས་རྒྱས་དངོས་སུ་མཐོང་བའི་མོས་གུས་ཀྱིས་ཕྱག་ཆེན་ལྟ་བའི་ནམ་འཕང་ཅིག་ཅར་དུ་ཆོད་དེ་རྡོ་རྗེ་འཆང་གི་རྒྱལ་ཐབས་ལ་མངའ་དབང་བསྒྱུར་བ་གྲུབ་ཆེན་ཏི་ལླི་པ་དང་པཎ་ཆེན་ནཱ་རོ་པ་ལྟ་བུར་འགྱུར་བར་ཤོག་ཅིག །རྡོ་རྗེའི་ལུས་ལ་རླུང་སེམས་ཀྱི་རྟེན་འབྲེལ་གནད་དུ་བསྣུན་ནས་ཐབས་ལམ་ནཱ་རོའི་ཆོས་དྲུག་སྒོམ་པའི་རྒྱལ་ས་ཟིན་ཏེ་ཟུང་འཇུག་ཆེན་པོའི་འབྱོར་པས་ཕྱུག་པ་སྐྱེས་མཆོག་མར་མི་དྭགས་གསུམ་དང་བདེ་གཤེགས་ཕག་མོ་གྲུ་པ་ལྟ་བུར་འགྱུར་བར་ཤོག་ཅིག །རྐྱེན་བཟང་ངན་ཐམས་ཅད་ལམ་དུ་ཁྱེར་ནས་རོ་སྙོམས་ཀྱི་སྤྱོད་པ་ཚད་དུ་ཕྱིན་ཏེ་ཕྱོགས་ལས་རྣམ་རྒྱལ་གྱི་བརྟུལ་ཞུགས་བརྙེས་པ་གྲུབ་ཆེན་གླིང་རས་དང་འགྲོ་མགོན་རྒྱ་རས་ལྟ་བུར་འགྱུར་བར་ཤོག་ཅིག །དམ་པའི་ཆོས་ཐམས་ཅད་ཀྱི་སྙིང་པོ་རྟེན་འབྲེལ་རབ་བདུན་མའི་ཉམས་ལེན་མཐར་ཕྱིན་ནས་ཇི་ལྟ་བའི་གནས་ལུགས་མངོན་དུ་གྱུར་ཅིང་ཇི་སྙེད་པའི་རྟེན་འབྲེལ་འཆར་ནས་འབྲས་བུ་རང་ལས་རྙེད་པ་རྒྱལ་བ་ལོ་རས་པ་དང་ཆོས་རྗེ་རྒོད་ཚང་པ་ལྟ་བུར་འགྱུར་བར་ཤོག་ཅིག །མཉམ་ཉིད་ཁྱབ་གདལ་ཆེན་པོའི་མོས་གུས་ཀྱིས་ལམ་ཟབ་པ་ཐམས་ཅད་ཀྱི་མཐར་ཐུག་བླ་མའི་སྒྲུབ་པ་མཐར་ཕྱིན་ནས་རང་དོན་དུ་ཁ་སྦྱོར་ཡན་ལག་བདུན་དང་ལྡན་པའི་རྡོ་རྗེ་འཆང་ཆེན་པོའི་གོ་འཕང་ཚེ་འདིར་ཐོབ་ཅིང༌། གཞན་དོན་དུ་གཟུགས་སྐུ་རྣམ་པ་གཉིས་ཀྱི་སྒོ་ནས་བསྟན་འགྲོའི་དོན་རྒྱ་ནམ་མཁའ་དང་མཉམ་པ་དུས་འཁོར་བ་མ་སྟོངས་ཀྱི་བར་དུ་བྱེད་ནུས་པར་ཤོག་ཅིག །དེ་ལྟར་དཀོན་མཆོག་རྩ་གསུམ་བདེན་པའི་མཐུ་དང་ཆོས་ཉིད་འགྱུར་བ་མེད་ཅིང་ཆོས་ཅན་རྒྱུ་འབྲས་བསླུ་མེད་བདེན་པའི་སྟོབས་ཀྱིས་བདག་གི་སྔོན་བྱོན་གོང་མ་རྣམས་ཀྱི་རྗེས་སུ་ཇི་ལྟར་སྨོན་པ་དེ་དེ་བཞིན་དུ་འགྲུབ་པར་གྱུར་ཅིག །ཅེས་པ་འདིའང་ཡོན་ཏན་འོད་ཀྱིས་སྨོན་པའོ།།
0 Comments
ཐུགས་འཆར་བཀོད་གནང་།