སྨོན་ལམ་རྩ་གསུམ་བདེན་པ།

 སྨོན་ལམ་རྩ་གསུམ་བདེན་པ།

༄༅། །རྩ་གསུམ་བདེན་པའི་ཐུགས་རྗེས་མྱུར་དུ་བདག །ཚེ་འདིའི་དཔལ་འབྱོར་འཇིག་ངེས་ཡུད་ཙམ་ལ། །ཆགས་པའི་ཆོས་བརྒྱད་སྣང་ཞེན་དམ་པོའི་སྒྲོག །བཅད་དེ་དབེན་པའི་དགའ་བདེར་འཚོ་བར་ཤོག །ཕྱིར་བལྟས་ཤེས་རྒྱ་བཅད་པའི་རིང་ལམ་ལའང༌། །མ་ཆགས་ཁ་ནང་ཁོ་ནར་ཕྱོགས་པ་ཡིས། །གང་ཞིག་ཤེས་ན་ཆོས་ཀུན་མངོན་གྱུར་པའི། །སེམས་ཀྱི་གནས་ལུགས་ཉག་གཅིག་བསྒོམ་པར་ཤོག །ལམ་རྣམས་ཀུན་གྱི་ནང་ན་མཐར་ཐུག་པ། །རྟོགས་ལྡན་བླ་མ་དམ་པའི་བྱིན་རླབས་དབང༌། །རང་གི་སེམས་ལ་ཐོབ་སྟེ་ཚེ་འདི་ཀར། །འཁོར་འདས་ཀུན་གྱི་དཔལ་དུ་འགྱུར་བར་ཤོག །ཅེས་པ་འ
དི་རྗེ་ཡོན་ཏན་མཐའ་ཡས་ཀྱིས་མཛད་པའོ། ། ༈ བདག་གི་དུས་གསུམ་བསགས་པའི་དགེ་བ་ཡིས། །མཁའ་མཉམ་འགྲོ་བའི་སྒོ་གསུམ་དྲི་མའི་ཚོགས། །མ་ལུས་ལུས་པ་མེད་པར་བྱང་གྱུར་ཏེ། །མྱུར་དུ་རྣམ་མཁྱེན་སངས་རྒྱས་ཐོབ་པར་ཤོག །དེང་ནས་བྱང་ཆུབ་སྙིང་པོ་མ་ཐོབ་བར། །སྐྱེ་དང་སྐྱེ་བར་མི་ཁོམ་གནས་སྤངས་ཏེ། །དལ་འབྱོར་ལུས་ལྡན་སྡོམ་གསུམ་དམ་ཚིག་ལྡན། །མཚན་ལྡན་བླ་མས་རྗེས་སུ་འཛིན་པར་ཤོག །མཚན་ལྡན་བླ་མས་རྗེས་སུ་བཟུང་ནས་ཀྱང༌། །ཆོས་བརྒྱད་ལ་སོགས་ཉོན་མོངས་དྲི་མ་ཡི། །སྐྱོན་གྱིས་ཅུང་ཟད་ཙམ་ཡང་མ་གོས་པར། །ཆོས་ཉིད་རྣལ་མའི་དོན་ལ་སྤྱོད་པར་ཤོག །གཟུང་འཛིན་རྟོག་པའི་དྲྭ་བ་ཇི་སྙེད་པ། །གང་ཤར་རང་ངོ་ཤེས་པའི་ཉམས་ལེན་གྱིས། །ཟུང་འཇུག་རོ་མཉམ་རང་གྲོལ་བདེ་བ་ཆེ། །མངོན་སུམ་ཚད་མར་རྒྱུད་ལ་འཆར་བར་ཤོག །ཐེག་ཆེན་སྙིང་པོའི་མཐར་ཐུག་རྡོ་རྗེ་ཐེག །ཟབ་ལམ་གདམས་པའི་གནད་རྣམས་མ་ལུས་པ། །ཁོང་དུ་ཆུད་ནས་རང་གཞན་སྨིན་གྲོལ་ཏེ། །བཅུ་གསུམ་རྡོ་རྗེ་འཛིན་པའི་ས་ཐོབ་ཤོག །ངག་གི་དབང་པོས་སོ། ། ༈ བདག་སོགས་ཚེ་རབས་ཐམས་ཅད་དུ། །དམ་པ་ཁྱོད་དང་མི་འབྲལ་ཞིང༌། །ཁྱེད་གསུང་དམ་ཆོས་བདུད་རྩིའི་རོས། །རྣམ་པ་ཀུན་ཏུ་འཚོ་བར་ཤོག །རྒྱལ་བས་བསྔགས་པའི་གནས་རྣམས་སུ། །ཚེ་འདིའི་བྱ་བ་བློས་བཏང་ནས། །དོན་དམ་ཆོས་སྐུའི་བླ་མ་དང༌། །ནམ་ཡང་འབྲལ་བ་མེད་པར་ཤོག །རང་དོན་ཞི་བདེའི་བློ་སྤངས་ནས། །མཁའ་དང་མཉམ་པའི་འགྲོ་བ་རྣམས། །བདག་གིས་བརྩེ་བས་རྗེས་བཟུང་ནས། །ཐར་པའི་ལམ་ལ་འགོད་པར་ཤོག །རྒྱལ་དབང་རྗེའི་གསུང་ངོ་། ། ༈ ཟག་ལུས་འདི་དང་མ་བྲལ་བར་དུ་ཡང༌། །འཁོར་བའི་སྡུག་བསྔལ་ཚོགས་ཀྱིས་མི་འཚེ་ཞིང༌། །མཐུན་རྐྱེན་མ་ལུས་ཕུན་སུམ་ཚོགས་པ་དང༌། །འགྲོ་བའི་སྡུག་བསྔལ་སེལ་བའི་མཐུ་ལྡན་ཤོག །སྐྱེ་བ་ཀུན་ཏུ་ཡང་དག་བླ་མ་དང༌། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང༌། །ས་དང་ལམ་གྱི་ཡོན་ཏན་རབ་རྫོགས་ནས། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །ཤེས་བྱ་རིག་གནས་ཐམས་ཅད་ལ་མཁས་པར་གྱུར་ཏེ། ཕས་ཀྱི་རྒོལ་བ་མ་ལུས་པ་བཅོམ་ནས་སངས་རྒྱས་ཀྱི་བསྟན་པ་དར་བར་བྱེད་ནུས་པ་ཞིག་ཏུ་གྱུར་ཅིག །སེམས་ཉིད་མ་རྟོགས་པ་རྣམས་ཀྱི་དོན་བྱེད་པར་ཤོག་ཅིག །དོན་བྱེད་པའི་སེམས་ཅན་ཐམས་ཅད་ཀྱི་རང་ལ་གནས་པའི་ཡེ་ཤེས་ཕྱིན་ཅིག་མ་ལོག་པར་རྟོགས་པར་ཤོག་ཅིག །རྟོགས་ནས་སེམས་ཅན་ཐམས་ཅད་ཀྱིས་ཀྱང་གཞན་དོན་ཕུན་སུམ་ཚོགས་པར་འབྱུང་བར་གྱུར་ཅིག །དགེ་བའི་རྩ་བ་དེས་ཚེ་རིང་བ་དང་། ནད་མེད་པ་དང་སྒྲུབ་པ་ལ་བར་ཆད་མེད་ཅིང་། མཉམ་རྗེས་ཐམས་ཅད་དུ་སྟོང་པ་དང་སྙིང་རྗེ་མཉམ་པར་གནས་ནས། མཐོང་ཐོས་ཐམས་ཅད་ལ་ཕན་པ་རྒྱ་ཆེན་པོ་ཐོགས་ནས་འགྲོ་བ་ཐམས་ཅད་ཀྱི་ཡིད་དུ་འོང་བར་གྱུར་ཅིག །དུས་ད་ནས་འཁོར་བ་མ་སྟོང་གི་བར་དུ་ལྷུན་གྱིས་གྲུབ་པས། སེམས་ཅན་གྱི་དོན་འགྲུབ་ནས་སེམས་ཅན་ཐམས་ཅད་ལ་ཆོས་འབའ་ཞིག་གིས་ཕན་ཐོགས་པར་གྱུར་ཅིག །ཟད་ཅིང་སྟོང་པར་གྱུར་ཅིག་འཁོར་བ་ངན་སོང་གསུམ། ཞི་ཞིང་རླག་པར་གྱུར་ཅིག་ནག་པོ་བདུད་ཀྱི་སྡེ། བདེ་ཞིང་སྐྱིད་པར་གྱུར་ཅིག་མཐའ་ཡས་སེམས་ཅན་རྣམས། དར་ཞིང་རྒྱས་པར་གྱུར་ཅིག་གཙུག་ལག་དམ་པའི་ཆོས། སྐུ་ཚེ་རིང་བར་གྱུར་ཅིག་བླ་མ་དགེ་བའི་བཤེས་གཉེན་རྣམས། བདག་གིས་སྨོན་ལམ་འདི་བཏབ་པས། །ཀུན་གྱི་སྨོན་ལམ་འགྲུབ་གྱུར་ཅིག །དཀོན་མཆོག་གསུམ་ལ་ཕྱག་འཚལ་ལོ། །ཏདྱཐཱ། ༀ་པཉྩི་གྲི་ཡ་ཨ་ཝ་བྷོ་དྷ་ནི་ཡེ་སྭཱཧཱ། དགེ་བ་འདི་ཡིས་མཁའ་མཉམ་སེམས་ཅན་གྱི། །སྡིག་དང་སྒྲིབ་པའི་ཚོགས་ཀུན་བྱང་གྱུར་ཏེ། །བསམ་པའི་དོན་ཀུན་ཡིད་བཞིན་འགྲུབ་གྱུར་ནས། །བླ་མའི་བྱང་ཆུབ་མྱུར་དུ་ཐོབ་པར་ཤོག །གཙུག་ལག་རྣམས་ནི་ཀློག་པ་དང་། །ཁ་ཏོན་གྱིས་ཀྱང་ལེགས་གནས་ཤོག །རྟག་པར་དགེ་འདུན་མཐུན་པ་དང་། །དགེ་འདུན་དོན་ཡང་འགྲུབ་པར་ཤོག །ལོག་ལྟའི་བདུད་རྣམས་མ་ལུས་པ། །བསྟན་པའི་བར་ཆད་རབ་ཞི་ནས། །བདེ་སྐྱིད་ཐུགས་རྗེ་ཉི་མ་དེས། །སེམས་ཅན་ཡོངས་ལ་འཆར་བར་ཤོག །ཕ་མ་སེམས་ཅན་ཐམས་ཅད་བདེ་དང་ལྡན་གྱུར་ཅིག །ངན་འགྲོ་ཐམས་ཅད་རྟག་ཏུ་སྟོང་པར་ཤོག །བྱང་ཆུབ་སེམས་དཔག་གང་དག་སར་བཞུགས་པ། །དེ་དག་ཀུན་གྱི་སྨོན་ལམ་འགྲུབ་གྱུར་ཅིག །བྱང་ཆུབ་སེམས་མཆོག་རིན་པོ་ཆེ། །མ་སྐྱེས་བ་རྣམས་སྐྱེ་འགྱུར་ཅིག །སྐྱེས་པ་ཉམས་པ་མེད་པ་ཡང་། །གོང་ནས་གོང་དུ་འཕེལ་བར་ཤོག །