བསངས་གསུར་མཐུན་མོང་གི་མཆོད་པ།
༄༅། །སྐྱབས་སེམས་སྔོན་དུ་འགྲོ་ནས། སྭ་བྷ་ཝ་བརྗོད། སྟོང་པའི་ངང་ལས་སྐད་ཅིག་དྲན་རྫོགས་སུ། །རང་ཉིད་ཇོ་བོ་ཁ་སར་པ་ནིའི་སྐུ། །བཞེངས་སྟབས་ཕྱག་གཡས་མཆོག་སྦྱིན་ཅན་གསལ་བའི། །མདུན་དུ་རྣམ་པར་སྣང་མཛད་གངས་ཆེན་མཚོ། །སྐུ་ལ་ཞིང་ཁམས་རྫོགས་པའི་གཙུག་གཏོར་ནས། །མགྲིན་པ་ཡན་ཆད་དཀོན་མཆོག་སྲི་ཞུའི་མགྲོན། །དེ་ཡི་ཐུགས་ཀར་ལྟེ་བའི་བར་དག་ལ། །མགོན་པོ་ཡོན་ཏན་སྐུ་སྨད་སྙིང་རྗེའི་མགྲོན། །པད་གདན་བགེགས་རིགས་ལན་ཆགས་གསལ་བ་ལས། །ཐུགས་ཀར་ཡི་གེ་དྲུག་མའི་འོད་ཟེར་གྱིས། །མཆོད་ཡུལ་མཉེས་བྱས་སྦྱིན་ཡུལ་སྡིག་སྒྲིབ་སྦྱངས། །ཁམས་གསུམ་མ་ལུས་དག་པའི་ཞིང་དུ་གྱུར། །ༀ་མ་ཎ་པདྨེ་ཧཱུཾ་ཧྲཱི། བརྒྱ་རྩ་བརྗོད། རང་ལུས་འཕགས་པར་གསལ་བའི་ཐུགས་ཀ་ནས། །གཉིས་འཛིན་འཁྲུལ་པའི་སྣང་བ་ཀུན་བསྲེགས་པའི། །རང་རིག་ཡེ་ཤེས་་གསལ་བའི་མེ་དཔུང་འབར། །དྲི་བཟང་སྨན་སྤོས་སམ་དཀར་གསུམ་མངར་གསུམ་རང་བྱུང་ལྷན་སྐྱེས་ཀྱི། །བསངས་སམ་གསུར་དུད་ནམ་མཁའ་ས་གཞི་ཐམས་ཅད་གང༌། །དུད་པའི་གསེབ་ནས་འདོད་ཡོན་ལྷ་མོ་སོགས། །རྣམ་བཞིའི་མགྲོན་ཀུན་ཐུགས་ལ་ཅི་མཉེས་པ། །ཀུན་བཟང་མཆོད་པའི་སྤྲིན་བཞིན་འཐིབས་པར་གྱུར། །ༀ་ཨཱ་ཧཱུཾ། ལན་གསུམ་བརྗོད། ཧོཿ མཆོག་གསུམ་བླ་མ་ཡི་དམ་ཞི་ཁྲོའི་ལྷ། །དཔའ་བོ་མཁའ་འགྲོ་དཔལ་མགོན་དམ་ཅན་ཚོགས། །ཡུལ་ལྷ་གཞི་བདག་སྙིང་རྗེ་ལན་ཆགས་མགྲོན། །ཐམས་ཅད་དེང་འདིར་སྤུངས་ཀྱིས་བྱོན་པར་གྱུར། །བསངས་སམ་གསུར་མཆོད་བདུད་རྩིའི་མཆོད་པ་དམ་པ་འདི། །དགོངས་བརྡ་སྙན་བརྒྱུད་བཀའ་གཏེར་བཤད་སྒྲུབ་ཀྱི། །རྩ་བརྒྱུད་བླ་མ་མཆོག་གསུམ་རྣམས་ལ་འབུལ། །མི་འབྲལ་ཆོས་སྐུའི་ངང་དུ་རོ་གཅིག་པའི། །སྒོ་གསུམ་སྨིན་གྲོལ་བྱིན་གྱིས་བརླབ་ཏུ་གསོལ། །ཐེག་པ་རིམ་དགུ་གསང་སྔགས་གསར་རྙིང་གི། །ཡི་དམ་ཞི་ཁྲོ་རབ་འབྱམས་རྣམས་ལ་འབུལ། །ཁམས་གསུམ་རྣམ་དག་རྒྱལ་བའི་དཀྱིལ་འཁོར་ཆེ། །ཚེ་འདིར་བསྒྲུབ་པའི་དངོས་གྲུབ་བསྩལ་དུ་གསོལ། །ཆོས་བཞིན་སྤྱོད་པའི་ཕྲིན་ལས་གྲོགས་མཛད་མ། །ཡེ་ཤེས་ཌཀྐི་དམ་ཅན་རྒྱ་མཚོར་འབུལ། །ས་དང་ལམ་གྱི་བར་ཆད་ཀུན་སེལ་ནས། །བསྟན་འགྲོར་ཕན་བདེའི་ཕྲིན་ལས་སྒྲུབས་པར་མཛོད། །ཁྱད་པར་ཁྲག་འཐུང་མཧཱ་ཀཱ་ལ་ཆེ། །དུད་སོལ་ལྷ་མོ་ལེགས་ལྡན་བྱ་རོག་གདོང༌། །ཐུགས་གསུང་སྐུ་ཡི་ལྷ་ཚོགས་རྣམས་ལ་འབུལ། །རྒྱལ་བའི་བསྟན་པ་བསྲུང་ཞིང་སྐྱོང་བ་དང། །དེ་འཛིན་སྐྱེས་བུའི་ཕྲིན་ལས་སྤེལ་བར་མཛོད། །ཆོས་བཞིན་སྒྲུབ་པའི་རྣལ་འབྱོར་བདག་ཅག་ལ། །བུ་བཞིན་བརྩེ་བའི་མགོན་སྐྱབས་མི་གཡེལ་བར། །སྔོན་གྱི་ལས་དང་འཕྲལ་གྱི་རྐྱེན་ངན་པ། །ན་ཚ་སྡུག་བསྔལ་ཐམས་ཅད་ཞི་བར་མཛོད། །ཡིད་ལ་བསམ་པའི་དོན་རྣམས་འགྲུབ་པ་དང༌། །ཚེ་དང་ལོངས་སྤྱོད་དཔལ་འབྱོར་རྒྱས་པར་མཛོད། །ཕ་རོལ་བསམ་སྦྱོར་ངན་པའི་གནོད་པ་དང༌། །དམ་སྲི་ཕུང་སྲི་རྒྱལ་པོའི་ཆོ་འཕྲུལ་དང༌། །ལྷ་སྲིན་གདུག་པའི་ཟ་ཁ་ཟུག་པ་སོགས། །མི་མཐུན་ཚོགས་རྣམས་དགྲ་བོའི་སྟེང་དུ་བསྒྱུར། །གཞན་ཡང་སྟེ་འོག་ཕྱོགས་མཚམས་གནས་པ་ཡི། །འཇིག་རྟེན་སྐྱོང་བ་ལྷ་སྲིན་སྡེ་བརྒྱད་སོགས། །གནས་དང་ཡུལ་གྱི་བདག་པོ་རྣམས་ལ་འབུལ། །འཇིག་རྟེན་ཁམས་ཀུན་བདེ་ཞིང་སྐྱིད་པ་དང༌། །ཆར་ཆུ་དུས་འབེབས་སད་དང་སེར་བ་ཞི། །ལོ་ལེགས་ཆོས་འཕེལ་རྒྱལ་པོ་ཆོས་བཞིན་སྤྱོད། །ནད་མུག་འཁྲུགས་རྩོད་ཐམས་ཅད་ཞི་བར་མཛོད། །རིགས་དྲུག་ཕ་མ་བར་དོའི་སེམས་ཅན་དང། །ཡི་དྭགས་རིགས་སུ་གྱུར་པ་རྣམས་ལ་བསྔོ། །འཁྲུལ་སྣང་འཇིགས་སྐྲག་སྡུག་བསྔལ་ཀུན་ཞི་ཞིང༌། །རང་སེམས་དབང་ཐོབ་འཁོར་བར་ངེས་འབྱུང་སྟེ། །བྱང་ཆུབ་ས་ལ་མྱུར་དུ་འཁོད་པར་ཤོག །དྲི་ཟ་ལ་སོགས་གདོན་གྱི་ཚོགས་རྣམས་དང༌། །སྲོག་གཅོད་དབུགས་ལེན་མདངས་འཕྲོག་འབྱུང་པོའི་ཚོགས། །ཐམས་ཅད་བསངས་སམ་གསུར་མཆོད་བདུད་རྩིའི་མཆོད་པ་འདིས། །རང་རང་འདོད་པའི་རེ་བ་ཡོངས་གང་ནས། །ཞེ་སྡང་གདུག་པའི་བསམ་སྦྱོར་ཉེར་ཞི་ཞིང༌། །གཞན་ཕན་བྱང་སེམས་རྒྱུད་ལ་སྐྱེ་བར་ཤོག །བཅོམ་ལྡན་འདས༴ །གཟུགས་མཛེས༴ །སྐུ་འབྱམས༴ །འཇིགས་པ༴ །ན་མཿསརྦ་ཏ་ཐཱ་ག་ཏ་སོགས་ཀྱི་མཐར། ཨ་ཀར་རོ་སོགས་བརྗོད། ཧོཿ བླ་མ་རྣམས་ལ་བསངས་སམ་གསུར་མཆོད་ཕུལ་བའི་མཐུས། །རང་བཞིན་གདོད་མའི་གནས་ལུགས་རྟོགས་པར་ཤོག །ཡི་དམ་རྣམས་ལ་བསངས་སམ་གསུར་མཆོད་ཕུལ་བའི་མཐུས། །དངོས་གྲུབ་རྣམ་གཉིས་མྱུར་དུ་ཐོབ་པར་ཤོག །མཁའ་འགྲོ་རྣམས་ལ༴ །འཕྲིན་ལས་རྣམ་བཞི་རྩོལ་མེད་འགྲུབ་པར་ཤོག །ཆོས་སྐྱོང་རྣམས་ལ༴ །བྱང་ཆུབ་ལམ་ལ་བར་ཆད་མེད་པར་ཤོག །ཡོན་ཏན་མགྲོན་ལ༴ །བསྟན་པ་བསྲུང་ཞིང་སྟོངས་གྲོགས་བྱེད་པར་ཤོག །དམ་ཅན་རྣམས་ལ༴ །བསྟན་དགྲ་དམ་ཉམས་མྱུར་དུ་བསྒྲལ་བར་ཤོག །གཞི་བདག་མགྲོན་ལ༴ །བདག་ཅག་དཔོན་སློབ་འཁོན་འདྲིས་མེད་པར་ཤོག །སྙིང་རྗེའི་མགྲོན་ལ༴ །སྡུག་བསྔལ་ཀུན་བྲལ་སངས་རྒྱས་ཐོབ་པར་ཤོག །ལན་ཆགས་མགྲོན་ལ༴ །ཚེ་རབས་གྲངས་མེད་ལན་ཆགས་བྱང་བར་ཤོག །བསངས་སམ་གསུར་མཆོད་ཕུལ་བའི་མཐུ་དང་བྱིན་རླབས་ཀྱིས། །ཚོགས་གཉིས་ཡོངས་རྫོགས་དོན་གཉིས་ལྷུན་གྲུབ་ཤོག །མཆོད་ཡུལ་གོང་མ་ཡེ་ཤེས་པ་ཡི་མགྲོན། །བདག་ལ་ཐིམ་པས་འོད་གསལ་ངང་དུ་བཞག །དམིགས་ཡུལ་འོག་མ་འཇིག་རྟེན་པ་ཡི་མགྲོན། །ཞི་བའི་སེམས་ཀྱིས་རང་རང་གནས་སུ་གཤེགས། །མཆོད་སྦྱིན་གནས་འདིར་གང་ལྷགས་པ། །འབྱུང་པོ་ས་འོག་རྒྱུ་བ་དང༌། །གང་ཡང་ས་འདིར་འཁོད་པ་དང༌། །ས་བླར་རྒྱུ་བ་གང་ཡིན་པ། །མགུ་བར་གྱིས་ལ་རང་གནས་སུ། །ཐམས་ཅད་ཐ་དད་འགྲོ་བར་གྱིས། །སརྦ་བྷུ་ཏ་གཙྪ། སྦྱིན་པ་རྒྱ་ཆེར་སོགས་བསྔོ་སྨོན་གྱིས་རྒྱས་གདབ། ཞེས་པའང་དགེ་རིན་པས་སོ།།
0 Comments
ཐུགས་འཆར་བཀོད་གནང་།